Ekonomi

FMN: Rrugët e Kosovës larg standardeve të BE-së

10:55 | 12 February 2018

Janë vetëm 90 kilometra rrugë në tërë Kosovën që janë të paasfaltuara, por edhe ato që janë të asfaltuara janë shtruar vetëm shkel e shko. Rrugët e Kosovës nuk i afrohen as për së afërmi standardeve të BE-së, shkruan Infokusi.com.

Në gjendje më të mirë nuk janë as rrugët e Shqipërisë, Serbisë, Maqedonisë, Malit të Zi, ish Republikës Jugosllave e Bosnjës dhe Hercegovinës.

“Vendet e Ballkanit Perëndimor (Shqipëri, Bosnje dhe Hercegovinë, Kosovë, Ish Republika Jugosllave e Maqedonisë, Mal i Zi dhe Serbi) kanë rrjete të transportit, energjisë dhe telekomunikacionit që nuk janë të zhvilluara sa duhet, në krahasim me mesataren e Bashkimit Evropian (BE)”

Kështu thuhet në raportin “Fokusi shtetëror i FMN”, që ka publikuar Fondi Monetar Ndërkombëtar, shkruan Infokusi.

Sipas këtij raporti, mungesa e infrastrukturës themelore publike në rajon, nga FMN-ja po konsiderohet si pengesë e rëndësishme për rritje më të lartë ekonomike.

FMN-ja konsideron që përmirësimi i rrjetit të transportit, energjisë dhe telekomunikacionit do të ndikonin në rritjen e produktivitetit, integrimin më të thellë në rrjedhën e tregtisë globale dhe do të ndikonin në investimet e huaja.

“Rrjetet më të mira të transportit, energjisë dhe telekomunikacionit do të ndihmonin vendet e Ballkanit Perëndimor që ta rrisin produktivitetin, të integrohen më thellë në rrjedhën e tregtisë globale dhe ta përmirësojnë atraktivitetin e rajonit për investime të huaja”, thuhet në raportin e publikuar nga FMN-ja./INFOKUSI/.