Rajoni dhe Bota

Ivanov: NATO dhe BE janë fajtorë për krizën në Maqedoni

12:53 | 29 December 2016
ivanov-fjalimi-i-fundvitit_1483009558-5968471

Presidenti maqedonas Gjorge Ivanov në fjalimin e fundvitit u drejtua me tone të ashpra ndaj NATO dhe BE-së duke i konsideruar ata fajtorë kryesorë të krizës politike në vend. Me këtë ai e rikonfirmoi bindjen e përgjithshme se është vetëm një ushtar i bindur i shefit të tij dhe partisë së tij, Nikolla Gruevskit, i cili pas zgjedhjeve të 11 dhjetorit porositi ambasadorët perëndimorë që “të mos përzihen në punët e brendshme të Maqedonisë.

Ivanov, siç raporton Alsat-M, tha se vendet e NATO-s dhe BE-së penguan integrimin e Maqedonisë në strukturat euro atlantike dhe vendi në vend që të shpërblehej u dënua, në vend që të anëtarësohej u bllokua. “Shkelën mbi dinjitetin e popullit duke kërkuar ndryshimin e identitetit dhe nuk vlerësuan strategjinë e vendit në menaxhimin me krizën e migrantëve”, tha Ivanovi.

Presidenti maqedonas gjithashtu theksoi gjatë fjalimit të tij se asnjëherë nuk do të lejojë federalizimin e vendit. Sipas tij regjistrimi i vendit duhet medoemos të realizohet.

Ivanov gjithashtu ftoi liderët e dy partive më të mëdha politike, Gruevskin e VMRO-DPMNE-së dhe Zoran Zaevin e LSDM-së, që të tejkalojnë mosmarrëveshjet, ta qetësojnë situatën dhe të shtrijnë dorën e pajtimit.

“Nga qeveria e re pres që të angazhohet në mbrojtjen e interesave qytetare dhe të propozojë një zgjidhje sistematike të krizës”, tha Ivanov.

Gjatë fjalimit Ivanov u ndal edhe në rrezikun nga terrorizmi.

“Vitin e kaluar ishim dëshmitarë të tentativës së 40 terroristëve për të hyrë në kufirin verior dhe ky rrezik vazhdon nga të huajt që janë kthyer nga lindja e afërt.

Ndikimi i tyre u zgjerua duke krijuar krizë të brendshme. Për të zgjidhur krizën u detyrova të nënshkruaj faljet. Një ditë kur qytetarët të kenë pasqyrë të qartë do ta kuptojnë pse e bëra këtë.

Republika e Maqedonisë nuk është dhe nuk do të pajtohem asnjëherë që të jetë vend binacional”, porositi Ivanovi.