Lajme

Jasharaj falënderon deputetët që votuan për mësimdhënësit

17:28 | 17 May 2018 Autori: Infokusi

I pari i SBASHK-ut nuk e pati aspak të lehtë deri tani.

Atij dhe kolegeve të tjerë ju dashtë që të ndjekin shumë takime, e shpesh të kërcënojnë edhe me grevë.

I gjithë ky mund i sindikatës së arsimit ishte për të shtyrë përpara një projektligj, që njeh statusin e mësimdhënësve të arsimit shqip të viteve të 90-ta. Projektligj i cili këtë të enjte u mbështet nga deputetët e Kuvendit, shkruan Infokusi.com

Lajm tepër i mirë ky për kryetarin e kësaj sindikate Rrahman Jasharin, i cili për Infokusin ka thënë se nga premtimet që ka pasur, kalimin e këtij projektligji e kishte pritur.

“Të them të vërtetën nga komisioni parlamentar për arsim në të cilin kanë qenë pjesëmarrës të gjithë deputetët por edhe në takimet individuale me deputetet, ne e kemi prit që deputetët do t’i thonë po këtij projektligji në dëgjimin e parë”, ka thënë Jasharaj për Infokusin.

Ndonëse iu gëzua lajmit, Jasharaj ka thënë se tani SBASHK-ut i duhet që të punoj që të ruaj substancën e projektligjit deri në dëgjimin e dytë.

“Tani na mbetet që ne si SBASHK, por edhe të tjerët gjatë kësaj etape në mes të dëgjimit të parë dhe të dytë që të kontribuojmë në mënyrë që të ruhet substanca e këtij projektligji dhe të votohet edhe në dëgjimin e dytë e të bëhet ligj. Ashtu siç e thanë edhe disa deputet ky projektligj të bëhet ligj në shenjë respekti për njerëz që në vitet e 90-ta dhanë kontribut në ruajtjen e gjuhës dhe kulturës shqipe, si dhe për lirinë e Kosovës”, ka thënë Jasharaj.

Jasharaj është shprehur i kënaqur me mbështetjen e deputetëve ne Kuvend. Ai ka thënë se ata treguan respekt për kontributin e arsimtarëve të viteve 90-ta.

“Përgjithësisht deputetët e Kuvendit në një mënyrë apo tjetër dikush edhe konkretisht folën në mënyrë meritore folën për projektligjin. Përgjithësisht këta deputetët pavarësisht subjekteve politike treguan për respektin që kanë për vitet e 90-ta, dhe për punëtorët arsimor të asaj kohe”, përfundoj Jasharaj.

Ndryshe, janë bërë gati pesë vjet që autoritetet e arsimit në Kosovë, kanë premtuar miratimin e një ligji të veçantë, në bazë të te cilit do të shpaguhet puna e mësimdhënësve, që kanë punuar në periudhën 1990-1999. Kjo sindikatë që nga ky fillim vit ka mbajtur greva në arsim, ku mësimdhënësit kanë kërkuar që projektligji për statusin e punëtorëve të arsimit të viteve 1990-1999 të kalojë për miratim në Kuvend./Infokusi.com

Të tjera