Lajme

Kontejnerët e mbeturinave po digjen gjithëandej Kosovës

15:04 | 16 April 2018 | Autori: Infokusi

Janë për tu hedhur bërlloku, por qytetarëve duket se po ua zënë rrugën. Shpesh edhe po i djegin.

Vetëm në dy vitet e fundit në kryeqytet janë djegur rreth 100 kontejnerë të plastikës, shkruan Infokusi.com.

E në tërë kryeqytetin numri i kontejnerëve që ka në pronësi Kompania “PASTRIMI”, është më shumë se 1 mijë e 500.

Së paku kështu është shprehur për Infokusin vet zëdhënësja e Kompanisë Regjionale “Pastrimi”, Arbnorë Ademi.

Ademi ka thënë se kontejnerët janë të vendosur në çdo pjesë të qytetit.

“Kompania “Pastrimi”, SH.A-Prishtinë ka afro 1500 kontejnerë për mbeturina në Qytetin e Prishtinës, të cilët janë të vendosur në çdo pjesë të qytetit në mënyrë që qytetarët të kenë qasje tek kontejnerët në çdo cep të qytetit”, ka deklaruar Ademi për Infokusin.

LEXO EDHE: “Pastrimi” në dorë të të moshuarve

Ajo thotë se “Pastrimi”, rastet e djegieve të kontejnerëve vazhdimisht i ka raportuar në Policinë e Kosovës dhe Inspeksionin e Komunës së Prishtinës.

Infokusi ka dërguar pyetje edhe në Policinë e Kosovës për të mësuar se sa raste të tilla janë raportuar në Polici dhe nëse ka pasur të arrestuar, por ende është në pritje të përgjigjeve.

Ndryshe, ditë më parë për djegjen e kontejnerëve kishte alarmuar edhe Kryetari i Komunës së Prizrenit, Mytaher Haskuka. Ai këtë e pati cilësuar si dëmtim të pronës publike.

“Javën e kaluar vendosëm 120 kontejnerë të rinj, sot persona dashakeq ia kanë vënë zjarrin disa kontejnerëve. Prona publike është e përbashkët, kushdo që e dëmton është duke kryer krim”, kishte shkruar Haskuka në një postim në rrjetin social Facebook. (Arjeta Shabani)/Infokusi

Të tjera