Lajme

Luftë e madhe në LDK: Ky është kandidati që ka mbështetjen e strukturave për kryetar të Prishtinës

21:35 | 20 August 2017

Derisa po afrohet afati për dorëzimin e listave me emrat e kandidatëve për kryetar të komunave, në LDK po zhvillohet një luftë shumë e ashpër për emrin se kush do të garoj për kryetar të Prishtinës.

Sipas burimeve të Gazetës Blic janë disa kandidatë që kanë ambicie për të garuar për kryetar të Prishtinës. Megjithatë, këto burime shtojnë se strukturat e LDK-së në Prishtinë kanë dhënë disa propozime. E, mbështetjen më të madhe deri më tani e kanë dhënë për ish- kryetarin e Prishtinës, Ismet Beqirin.

Këto burime shtojnë se nëndegët dhe disa degë si emra kanë propozuar edhe tre kandidatë tjerë. Vjosa Osmanin, Lumir Abdixhikun e Arban Abrashin. “Pos Ismet Beqirit, i cili ka mbështetjen më të fuqishme, si emra nga disa degë e nëndegë janë propozuar Vjosa Osmani, Lumir Abdixhiku e Arban Abrashi. Mirëpo, Osmani e Abdixhiku nuk kanë shprehur interesim që ti hyjnë kësaj gare”, tha ky burim.

Sipas këtij burimi, gjasat më të mëdha për tu nominuar nga partia i ka Ismet Beqiri.

“Megjithatë pritet që partia shumë shpejt të vendos për kandidatin për kryetar të Prishtinës”, thonë këto burime.

Ndërkohë zyrtarisht nga LDK nuk duan të flasin për këtë temë dhe për emra konkret. Drejtues të kësaj partie janë zotuar se do ta nominojnë një kandidat kredibil.

Në anën tjetër, deri më tani vetëm VV dhe AAK kanë caktuar kandidatët e tyre për Prishtinën. E para do të garoj me Shpend Ahmetin, derisa AAK me Arbër Vllahiun.

Gazeta Blic dje ka raportuar se garës mund ti hyjë edhe Behgjet Pacolli, i cili tashmë e ka një plan konkret 12 pikësh për zhvillimin e Kryeqytetit.

Zgjedhjet lokale mbahen më 22 tetor.