Auto&Tech

Mbërrin Bitcoin ATM i parë në Kosovë

11:58 | 17 July 2017

Jetojmë në një epokë kur monedhat kriptografike janë bërë temë diskutimi nga mediet, shoqëria civile dhe investitorët. Sa më shpejtë të kuptohet kjo lëvizje si një risi teknologjike e ashtuquajtur BlockChain e cila vjen nga transformim madh i teknologjisë së informacionit, aq më i lehtë dhe me më pak pasoja do të jetë adaptimi i saj në një shoqëri apo shtet ligjor.

Sot në shtetet e zhvilluara, shumë shërbime, produkte kanë filluar të ofrohen kundrejt monedhës Bitcoin. Që nga Hotelet, karburanti, food delivery dhe deri taksat qeveritare siç është rasti i Gjermanisë, janë përshtatur transformimit teknologjik, pra duke u bërë pjesë e këtij komuniteti të madh global.
E ndërsa në Prishtinë dhe Tiranë, institucionet qeveritare si Doganat e Kosovës, apo Banka e Shqipërisë dalin me deklarata edukative, duke bërë apel për maturi në përdorimin e monedhave kriptografike, si gjithmonë sektori i biznesit është aktori proaktiv i cili bën hapin e parë.
Është pikërisht kompania “Albvision Ltd” e cila sjell këtë risi në Prishtinë. ATM-në e parë të saj të monedhës virtuale Bitcoin, me premtimin se Tirana dhe Shkupi do të jenë dy destinacionet e radhës të furnizimit me ATM të këmbimit të parasë virtuale.
ATM vjen në një kohë kur interesi për monedhat virtuale është rritur ndjeshëm në Shqipëri dhe Kosovë. 800 mijë euro janë shpenzuar për blerjen e pajisjeve që prodhojnë këto monedha në Kosovë shpreheshin dy javë më parë institucionet doganore.
ATM-ja, ku qytetarët e Kosovës mund të blejnë dhe shesin Bitcoin, do të vendoset në qendër të Prishtinës. Transaksionet e para do të kryhen vetëm në Bitcoin, ndërsa në të ardhmen edhe në 10 monedha të tjera virtuale.
Bitcoin është monedha virtuale më popullore në botë me një vlerë tregu prej 40 miliardë dollarësh. Që nga fillimi i vitit ajo pati një rritje të konsiderueshme duke prekur vlera rekord prej 3,000 dollarësh gjatë muajit qershor.
Albvision bëri të ditur se së shpejti edhe Tirana do të ketë ATM-në e saj të parë të monedhës virtuale.
Albvision themeluar në 2000 në Kosovë ushtron aktivitetin e saj në sektorët e sistemeve të informacionit dhe sigurisë, bankarë, postarë, energjetik, telekomunikacionit, komunikimit me mbi 10 vite eksperiencë në Shqipëri, Kosovë dhe Maqedoni. /PCWorld Albanian/