Opinione

Ne mund ta pastrojmë vet Kuvendin nga Krimi dhe të ndëshkojmë të korruptuarit e mashtruesit. Por a duam?

22:08 | 16 May 2017

Ne qytetarët e kemi obligim që një copë të zhvillimit të shtetit ta marrim në duart tona. Atë copë pra që na e garanton Kushtetuta. Nuk duhet dhe nuk mundemi më të jemi vetëm vëzhgues pasiv dhe ankues e vajtues aktiv. Kjo nuk është as demokracia, nuk është as liria dhe për me keq as përmbushje e obligimit qytetar që kemi. Prandaj me 11 qershor, AsTi dhe AsUNë.

Nga Astrit Gashi

Tashmë që afati i partive për dorëzimin në KQZ të listave të deputetëve është afruar, duket e pabesueshme se ato do të janë të filtruara në tërësi nga personat me histori politike të dyshimtë. Momenti është i fundit që qytetari me votën e tij të ndërhyjë aty ku partitë nuk kanë arritur dhe të largoj nga institucionet e vendit personat që ai dyshon se nuk e përfaqësojnë denjësisht sepse janë nën akuza, nën hetime, të dënuar apo thjeshtë nuk i kanë mbajtur premtimet qenësorë ndaj tyre ose e kanë tjetërsuar votën e marrë gjatë zgjedhjeve.

Janë bërë shumë vite që kur përfaqësues të bashkësisë ndërkombëtare në Kosovë, shoqëria civile e mediat kërkojnë pastrimin e listave zgjedhore nga persona me histori kriminale. Po aq vite kemi dëgjuar shefa të partive duke premtuar se do të hyjnë me njerëz të pastër në zgjedhje. Asnjëherë premtimet e tyre nuk janë realizuar plotësisht- ose thënë më saktë gati se nuk janë realizuar fare.

Dy janë arsyet kryesore që partitë kanë refuzuar të pastrojnë oborrin e tyre, dhe që me gjasë serish do ta bëjnë.

E para dhe kryesorja është se një pjesë e atyre që duhet pastruar për partitë tona janë më të vlefshëm në votë dhe financa, sesa kërkesa qytetare që ato të janë të pastra. Partitë politike më shumë e duan pushtetin, sesa pastërtinë e tyre, andaj nuk kanë vullnet të mjaftueshëm për ti larguar nga lista politikanët me veprimtari të dyshimtë ose të ndëshkuar.

E dyta, dhe kjo më shumë vlen si arsyetim sesa si një arsye e vërtetë, është se Ligji nuk parasheh një masë të tillë ndëshkuese. Para ligjit secili jemi të pafajshëm derisa të gjitha shkallët e sistemit ligjor të na nxjerrin të fajshëm. Po ashtu para ligjit edhe ata që kanë përfunduar dënimin dhe kanë kaluar 3 vite nga atëherë, janë qytetarë të njëjtë me secilin nga ne që as nuk kemi qenë të akuzuar e as të ndëshkuar. Ligji nuk ka faj këtu, ai është i drejtë dhe është në harmoni me të gjitha konventat ndërkombëtare.

Të dy këto arsye pra, mungesa e vullnetit të partive për t’u vetpastruar si dhe ligji i drejtë, kërkojnë ndërhyrjen e qytetarëve, për të mbyllur me votën e tyre edhe ato hapësira që qëndrojnë të hapura. Qytetari i Kosovës, votuesi i partive politike, duhet të shndërrohet vet në një korrektues të sistemit ose pjesës ku sistemi politik dhe ai juridik nuk mund të korrektohet vet.

Ne nuk duhet të harrojmë se duke u shndërruar në korrektues, nuk po bëjmë ndonjë gjë të madhe dhe të pabërë diku tjetër. Në fakt demokracitë perëndimore që ne i lakmojmë e nuk i heqim nga gojët tona asnjë moment, janë të tilla jo vetëm se kanë zbatim të fuqishëm të ligjit, pro edhe sepse ato në vazhdimësi korrektohen nga ndërhyrja qytetare dhe i adaptohen nevojave e kërkesave të qytetarit.

Duhet të jemi tepër naiv të besojmë se partitë politike në perëndim do të hiqnin nga vetja zyrtarë të korruptuar, në qoftë se opinioni publik do të heshtte dhe qytetari nuk do ju hakmerrej më votë. Askund në botë dhe asnjë parti nuk e bënë një gjë të tillë me një vullnet të plotë- por sepse humbin më shumë nëse i mbajnë.

Ne qytetarët e kemi obligim që një copë të zhvillimit të shtetit tonë ta marrim në duart tona. Atë copë pra që na e garanton Kushtetuta. Nuk duhet dhe nuk mundemi më të jemi vetëm vëzhgues pasiv dhe ankues e vajtues aktiv. Kjo nuk është as demokracia, nuk është as liria dhe për me keq as përmbushje e obligimit qytetar që kemi.

Prandaj me 11 qershor ne duhet të ngjallemi dhe me votën tonë të ndëshkojmë secilin kandidat që ne mendojmë dhe e dijmë se ka të kaluar kriminale. Të ndëshkojmë edhe secilin kandidat që na ka mashtruar ose që ka tjetërsuar votën tonë- sepse këto janë vepra po aq kriminale sa edhe vjedhja, grabitja e dhuna.
#AsUnë nuk do ti mbështes kandidatët e tillë, dhe mos i mbështet #AsTi.