Fun & Video

Peshkatarët në Durrës kapin “peshkaqen blu”

11:20 | 16 June 2017

Ditët e fundit ka pasur mjaft lajme rreth lojës së rrezikshme “Balena Blu”, por me sa duket ajo nuk qenka e vetmja me atë ngjyrë.

Kështu disa peshkatarë kanë kapur një peshkaqen në brigjet e Durrësit, i cili për çudi ishte mjaft i madh.

Por ajo që u ra në sy të gjithëve ishte pikërisht ngjyra blu e këtij peshkaqeni.

Duke parë formën dhe ngjyrën e këtij peshkaqeni të ‘çuditshëm’ dhe duke bërë një kërkim në ‘Google’ dhe më tej në “www.nationalgeographic.com”, zbuluam (për fat të keq) se, lloji i këtij peshkaqeni është “Maki blu” ose i njohur nga studiuesit e peshkaqenëve si “peshku silurë”.

Ky lloj peshkaqeni nuk është i zakonshëm për ujërat e Adriatikut dhe Jonit, pasi ai qëndron në Atlantikun e Veriut, por i ndikuar nga shkaqe të ndryshme, ku më të shpeshtat janë ngatërrimi i rrymave të ftohta oqeanike me ato të ngrohta (çka çorienton gjallesat e oqeanit, duke bërë që të ngatërrojnë habitatet e zakonshme), duket se edhe vizitorë të tillë na janë bërë peshqesh në ujërat e deteve tona.

Pas kapjes së një peshkaqeni “Tigër” (jo i zakonshëm për ujërat tanë) vetëm disa ditë më parë pranë Kepit të Rodonit në Gjirin e Lalzit, Durrës, sonte u zbulua dhe vra nga peshkatarët e paditur dhe pa informuar, edhe kjo specie e rrallë.

Por kujdes! “Maki blu” është një peshkaqen aspak “miqësor” dhe hyn në kategorinë e atyre që bashkë me llojin “Tigër” konsiderohen vrasës të njeriut.

“Maki blu” është një nga peshkaqenët më të shpejtë në botë dhe tërhiqet mjaftë nga zhurmat, sidomos ato të motorëve të barkave, skafeve dhe xhet-skive. Edhe pse nuk arrin përmasa të mëdha si shumë peshkaqenë të tjerë, ‘Maki’ gjithsesi mbetet mjaft agresiv dhe një gjahtar i përsosur i oqeaneve.

Në brigjet e Amerikës së Veriut (Bregu Lindor i SHBA-ve dhe Kanada), në Islandë, Britani dhe zona të tjera me dete relativisht të ftohtë, janë shënuar dhjetëra raste të sulmeve të “Makit blu” te njerëzit. Por edhe pse peshkatarët tanë po bëjnë “namin” duke kapur e vrarë lloje të ndryshme peshkaqenësh gjatë viteve të fundit, asnjë prej autoriteteve shtetërore që mbrojnë kafshët nuk u ka shpjeguar rrezikun dhe shumë pasoja të tjera degraduese që i vijnë si detit, ashtu dhe njeriut nga vrasja e këtyre specieve.

Image