Lajme

Privatizimi i egër, shkatërrues për gjigantin e prodhimit “IGK- Ballkan”

11:57 | 17 July 2017

Qëllimi i krijimit të ndërmarrjeve publike është si shkak i politikave monetare të shtetit. Në fakt objektivi kryesor i ndërmarrjeve shtetërore është ti shërbejë popullit dhe të ndihmojë në krijimin e zhvillimit gjithëpërfshirës të industrisë.

Fatkeqësisht politika të tilla fare pak po gjejnë përkrahje dhe privatizimi ka shtyrë thellë e me thellë rrënjët në vend.

“IGK Ballkani”, fabrika e prodhimit të shiritave transportues, si dhe e rrypave trapez në Suharekë, ishte gjiganti i vetëm në Evropë që mbante diku 1900 punëtor. Siç e dimë kjo fabrikë është privatizuar në vitin 2004 dhe ish-punëtoret e kësaj fabrike vazhdojnë të kërkojnë për kthimin e borxhit të 20 përqindëshit, por askush nuk e ka gajlen e tyre.

Kjo fabrikë është shembulli më i mirë i dështimit të privatizimit të ndërmarrjeve publike në Kosovë. Për këtë dështim ka folur edhe ish-punëtori i kësaj ndërmarrje, Ragip Guraziu, i cili ka treguar për dëmet që i janë bërë kësaj ndërmarrje, ose thëne më mirë edhe tërë këtij qyteti.

“Ballkani ishte një gjigant botëror kur shiritat tanë transportues të kësaj fabrike pushtuan të gjithë tregun botërore në të gjitha kontinente. Thënë shkurt privatizimi i kësaj ndërmarrje ka shkatërruar punëtoret e këtij gjiganti”, ka thënë Guraziu.

Biznesmenët privatë duan të fitojnë gjithnjë e më shumë duke u përpjekur të përqendrojnë sasi të madhe të fuqisë ekonomike, me qellim që ti kenë duar të lira drejt abuzimit me konsumatorët. Fatkeqësisht një abuzim i tillë ka shkatërruar ndërmarrjen “IGK Ballkani”që dikur mbante gjallë tërë regjionin.

Ky privatizim i mbrapsht ka bërë që një gjigant i prodhimit të kthehet në një kaos të konsumit, duke dhënë në shfrytëzim hapësirën e kësaj fabrike dy ndërmarrjeve private të cilat tashmë kanë përshtatur për interesa të profitit të tyre gjithçka që shohin para syve. Këto dy ndërmarrje private, Elkos Group dhe Viva Fresh Store kanë në shfrytëzim tash e sa kohë këto hapësira te IGK Ballkanit.

Dikur “IGK Ballkani” ishte shpresë për pothuajse 2000 punëtorë, të cilët sot e asaj dite tregojnë për kushtet që kishin aso kohe. Përveç rrogave të larta, për të cilat ish-punëtorët e kësaj fabrike ndjehen skeptik që do të arrihen ndonjëherë në Kosove, ata kishin edhe një sërë lehtësirash të tjera gjatë kohës sa kjo ndërmarrje ishte në fuqi.

“Dallimi i të ardhurave personale kishte pak dallim nga ata punëtorë që punonin në Gjermani ne atë kohë, 1200-1700 dinar që i bie mbi 1000 marka gjermane të viteve 70-80”, është shprehur Guraziu.

Suhareka dikur jepte për gjithë Evropën, kurse tani nuk është me as për veten. “IGK Ballkani” ka shkuar përtej privatizimit.

Tani kur nuk ka më shpresë nga kjo ndërmarrje, e cila i mbeti në borxh një numri të madh të atyre punëtorëve që dhanë shumë punë për ta ngritur në këmbë, halli i të gjithë atyre që njohin këtë gjigant është se si u dhanë ne shfrytëzim këto hapësira për Elkos Grup dhe Viva Fresh Store.

“Problemi qëndron tek fakti se si është mundur që kjo hapësire të shndërrohet nga një gjigant prodhimi në diçka konsumuese. Për me tepër kur dihet se kur aty dikur u mbulonte i gjithë regjioni me gjithë këto benifite që krijonte, sot është copëtuar me pothuajse 100 të punësuar me nga 200-300 euro page në muaj, përfshirë edhe kushtet minimale që iu jepen punëtoreve”, është shprehur një ish punëtor i IGK Ballkan-it.

Gjiganti i prodhimit me nuk është shprese për qytetaret e këtij qyteti, ata nga këtu kërkojnë vetëm edhe 20 përqindëshin e mbetur, ngase diçka tjetër me asgjë nuk mbetur.

Problemi i këtij privatizimi të egër që po gjen mbështetje nga udhëheqësit në vend, është problem i shumë më tepër banoreve në Kosovë. Krijimi i ndërmarrjeve publike është qenësor për zhvillimin e vendit. Kalimi nga prodhimi në konsum tregon hapur për një shoqëri të konsumit ©Infokusi.com