Lajme

Pse nuk shkoi Mustafa në takimin që e thirri vet? Flet Driton Selmanaj

23:22 | 25 April 2018

Sot u mbajt një tryezë politike e organizuar nga LDK ku ishin të ftuara të gjitha partitë politike.

Këtë takim e kishte kërkuar vet lideri i LDK-së, Isa Mustafa, dhe ftesën ua kishte dërguar të gjithë liderëve të partive politike në Kosovë.

Mirëpo përveç mungesave të shumta të liderëve tjerë, as Mustafa nuk ishte i pranishëm në këtë takim.

Driton Selmanaj nga LDK deklaroi se Mustafa është kthyer në Kosovë, mirëpo ai ende nuk është i gatshëm në kapacitetin e tij të plotë që t’i kthehet angazhimeve në politikë, shkruan rtv21.tv.

Selmanaj shpreson që rikthimi i Mustafës në angazhimet politike është çështje ditësh, ndërsa për partitë tjera politike Selmanaj deklaroi se ka qenë vendim i tyre se kë e delegojnë, dhe se beson se partitë kanë dërguar përfaqësuesit e tyre më dinjitozë.

Ndryshe në këtë takim është diskutuar nevoja për reformë zgjedhore dhe nevoja për konsensus për dialogun me Serbinë.

Edhe në këto dy tema nuk ka pasur asgjë konkrete, pos që të gjitha palët kanë dhënë qëndrimet e tyre.

Në tryezën e mbyllur për media morën pjesë Agim Veliu i LDK-së, Glauk Konjufca i VV-së, Memli Krasniqi i PDK-së, Dardan Sejdiu i GDP-së, Bilall Sherifi i Nismas, Blerim Kuçi i AAK-së, Ilir Deda i Alternativës, Agim Bahtiri i AKR-së, Valon Murati i LB-së dhe minoritetet.