Lajme

Shefi i UNMIK’ut flet për 13 prokurorët serbë në Kosovë në Këshill të Sigurimit të OKB’së

18:18 | 14 November 2017

Sot në Këshillin e Sigurimit të OKB’së u diskutua për Kosovën. Pjesë e këtij diskutimi ishte edhe integrimi i 13 prokurorëve të rinj të shtetit nga komuniteti serb në sistemin e drejtësisë së Kosovës. Për këtë çështje, në këshill të Sigurimit ka folur edhe Përfaqësuesi Special i Sekretarit të Përgjithshëm të OKB’së në Kosovë dhe Shefi i UNMIK’ut, Zahir Tanin.

Përfaqësuesi Special i Sekretarit të Përgjithshëm të OKB-së në Kosovë dhe shefi i UNMIK-ut, Zahir Tanin, theksoi para anëtarëve të Këshillit të Sigurimit sot se me përfundimin e ciklit zgjedhor në Kosovë, “koha e veprimeve tani tejkalon kohën e arsyetimeve”. Në raportimin e tij të rregullt për Kosovën, Tanin nënvizoi se shenjat e vullnetit politik dhe përkushtimit për të lëvizur përpara vërehen gjithnjë e më shumë.

Njoftimi për media thotë se duke folur për integrimin e 40 gjyqtarëve dhe 13 prokurorëve të rinj të shtetit nga komuniteti serb në “sistemin unik të drejtësisë në Kosovë”, Tanin lavdëroi palët për shtyrjen e këtij procesi përpara. Duke nënvizuar se zbatimi teknik përbrenda kornizës së dialogut të lehtësuar nga BE-ja kërkon përkushtim më domethënës nga të dyja palët, Tanin theksoi mungesën e progresit drejt zbatimit të marrëveshjes për Bashkësinë/Asociacionin e komunave me shumicë serbe.

“Duke nënvizuar rëndësinë e mospenguarjes së një procesi të qëndrueshëm paqeje nga jofleksibiliteti apo mosveprimi i thjeshtë, Tanin theksoi, “marrëdhëniet në mes të Beogradit dhe Prishtinës kanë potencial zhvillimi përtej ngërçit fatkeq të tejzgjatur.”

Sa i përket CEFTA-s, Tanin theksoi se përfaqësuesit e Prishtinës marrin pjesë në të gjitha takimet e CEFTA-s dhe se pjesëmarrja e UNMIK-ut kufizohet nga dispozitat e statuteve ligjore. “Kjo pjesëmarrje vazhdon pikërisht deri në masën e kërkuar nga anëtarët e CEFTA-s për të siguruar funksionimin e saj, që përkthehet pastaj në përkrahje të mundësive ekonomike përgjatë rajonit”, Tanin nënvizoi.

Tanin theksoi se, “nevoja urgjente e ofrimit të mundësive ekonomike dhe punësimit, nevoja e luftimit të korrupsionit dhe sigurimit të llogaridhënies publike në të gjitha nivelet, dhe ndoshta mbi të gjitha, luftimi i kriminalitetit të organizuar janë objektivat kryesore.” E objektivi përfundimtar mbetet i qartë, “paqja e qëndrueshme, dhe mundësitë që sjell për individët që t’i përmbushin aspiratat dhe potencialin e tyre.””, thuhet në njoftimin e dërguar për media.