Rajoni dhe Bota

Trump tregon pse nisi sulmet në Siri

16:43 | 07 April 2017

Donald Trump ka thënë se Assad “ua mori jetën burrave të pambrojtur, grave dhe fëmijëve” dhe se “madje edhe foshnje të bukura u vranë pamëshirshëm” përderisa lansoi sulmet kundër presidentit sirian.

Sulmi është i aksioni i parë direkt i ushtrisë amerikane kundër regjimit të Bashar al-Assad gjashtë vjet pas luftës civile.

Sulmi u dënua nga Rusia, që po mbështetë regjimin e Assadit, me Kremlinin që e quajti atë “një akt agresioni”.

Sulmi erdhi disa ditë pas sulmit kimik që ndodhi në qytetin Khan Sheikhoun të Sirisë, që rezultoi me vdekjen e 86 njerëzve, në mesin e tyre edhe 27 fëmijë, transmeton Gazeta Express.

Një orë pas nisjes së sulmeve kundër qeverisë së Assadit, Trump tha se veproi në interes të sigurisë së Amerikës, për të ndaluar përdorimin e armëve kimike.

Ai tha: “Duke përdorur një agjent vdekjeprurës nervor, Assad ua mori jetën burrave të pambrojtur, grave dhe fëmijëve. Ishte një vdekje e ngadalshme dhe brutale për shumë. Madje edhe foshnje të bukura u vranë mizorisht nga ky sulm barbar”.

“Asnjë fëmijë i Zotit nuk duhet të vuajë ndonjëherë një horror të tillë”, tha ai.