Lajme

Afër 10 mijë OJQ në Kosovë

Autori: Gazeta inFokus 16:32 | 17 May 2018

Lista e Organizatave Joqeveritare dhe shoqatave është përlotë. Janë afër 10 mijë sosh.

Të tilla ka për pëllumba, qenë e maca e çfarë të duash tjetër. Por ndonëse janë shumë në numër, aktivitete nuk kanë edhe aq.

Në Ministrinë e Administratës Publike, janë të regjistruara 9261 organizata joqeveritare vendore, ndërsa 534 tjera janë organizata joqeveritare ndërkombëtare.

Ky numër po konsiderohet të jetë i madh edhe për sociologun Ferdi Kamberin.

Sociologu ka thënë për Infokusin se roli i tyre në të kaluarën ishte ndryshe nga çfarë është sot.

“Fillimisht duhet theksuar se roli i organizatave të shoqërisë civile është tejet i lartë dhe pikërisht organizatat e shoqërisë civile tashmë të njohura si OJQ/NGO ishin ato që triumfuan ndaj sistemeve despotike/totalitare në shekullin e kaluar. Në rastin e Kosovës, shohim se OJQ-të pas vitit 1999 kanë evoluar dukshëm duke arritur një shifër prej 9917 prej tyre”, theksoi sociologu Kamberi.

Arsye se pse organizatat joqeveritare janë numerikisht shumë, por me aktivitet të mangët, sociologu Kamberi thekson mungesën e donacioneve. Ai thotë se shumica e kanë të vështirë të mbijetojnë pikërisht për këtë problem.

“Pavarësisht këtij numri tejet të lartë të OJQ-ve në Kosovë, një pjesë e tyre ose janë fiktive ose nuk funksionojnë më. Ndoshta kjo si rezultat i mos marrjes së donacioneve të ndryshme, për shkak se në rrethanat e Kosovës një OJQ vështirë se mund të mbijeton pa ndonjë donacion konkret. Kjo do të thotë se përderisa një OJQ është e regjistruar si OJQ e cila merret me ofrimin e shërbimeve konsultative ose promovimin e të drejtave të njeriut, të njëjtat OJQ merren edhe gjëra tjera të cilat nuk janë në domenin e tyre ose thjeshtë nuk figurojnë në statutin e tyre”, shtoi Kamberi.

Kamberi ka thënë se organizatat joqeveritare duhet të bëjnë publike të hyrat. Sipas tij Ministria e Administratës Publike duhet që të ketë vëzhgim të vazhdueshëm mbi veprimtarinë e tyre.

“Legjislacioni në Kosovë është goxha i avancuar dhe secila OJQ duhet që t’i bëjë publike të hyrat dhe të dalat e saj pran institucioneve përkatëse. Në këtë drejtim, konsideroj se do të duhej që të ketë një monitorim më të madh nga MAP-i mbi OJQ-të të cilat janë ose jo funksionale dhe së dyti do të ishte mirë që në një të ardhme të afërt Ligji për OJQ-të të ketë edhe një segment të profilizimit të OJQ-ve, pra të ketë edhe profile të tjera, sepse sipas këtij ligji edhe klubet sportive konsiderohen si OJQ”, përfundoi Kamberi.

Analizuar numrin kaq të madh të këtyre organizatave në raport me veprimtarinë që ushtrojnë në Kosovë, nga sociologu mendohet se Kosova ka një disbalanc të theksuar mes numrit të OJQ-ve dhe aktiviteteve që ushtrojnë./Infokusi.com

Të tjera