Lajme

Aktivistja e të drejtave të grave: Ngritja e memorialit të viktimave të përdhunuara, abuzim ndaj vetë viktimave

Autori: Gazeta inFokus 19:31 | 13 February 2018

Lidhur me deklaratat e Kadri Veselit për ndërtimin e memorialit të viktimave të përdhunuara gjatë luftës, ka reaguar aktivistja për të drejtat e grave, Valbona Bajrami.

Bajrami ka thënë se ngritja e memorialit të viktimave të përdhunuara gjatë luftës, është abuzim ndaj vetë viktimave, shkruan Infokusi.com

“Kjo ideja për ngritje të memorialit të viktimave të përdhunuara gjatë luftës, asht abuzim ndaj vetë viktimave. Memoriet traumatike ose represive nuk ushqehen me objekte që ua tërheqë kamzën dhe stimulojnë stresorët e kujtesës sa here që kalojnë pranë memorialëve, e që si rezultat mund të keqësojnë episodet e PTSD”, ka theksuar Bajrami.

Ajo ka thënë se shteti assesi nuk duhet të jetë shkas i stimulimit negativ të shtresorëve.

“Asesi nuk asht e pranueshme që shteti të jetë shkas i stimulimit negativ të stresorëve. Asociacioni global mental i lufton edhe imazhet vizuele që qarkullojnë nëpër internet, lëre më memoriale që aprovohen nga hierarki shtetesh”, ka shtuar Bajrami.

Veç tjerash Bajrami ka thënë se ideja e kryeparlamentarit Veseli nuk iu bënë nder viktimave, por rrit nivelin e traumës përtej asaj që kanë përjetuar viktimat.

“Kadri Veseli mund të hedhë ide të llojit, ose edhe të aplaudohet nga grupe njerëzish, por masa duhet ta kuptoj se me këso veprimesh nuk iu bën nder viktimave. Përkundrazi, nivelin e traumës e ushqen deri në pikë përtej asaj që kanë përjetuar viktimat, e që provokon viktima të tjerta për çrregullime mentale si rezultat i lodhjes nga bashkëndjenja”, ka thënë Bajrami./Infokusi.com 

Të tjera