Ekonomi

Krasniqi kërkon reforma në skemat pensionale dhe sociale

Autori: Gazeta inFokus 17:00 | 11 May 2018

Në tërë vendin janë më shumë se 350 mijë persona që përfitojnë nga skemat sociale dhe pensionale. E tërë ky numër i përfituesve buxhetit të shtetit i kushton rreth 372 milionë euro për çdo vit.

Për këtë ka reaguar edhe Albert Krasniqi nga Instituti Demokratik i Kosovës.

Krasniqi k a thënë se Kosovës i duhet një reformë e thellë pensionale dhe e skemave të asistencës sociale. Deklaron se numri i këtyre skemave po rritet në varësi të rënies së mbështetjes së partive në pushtet.

“Deri më tani i kemi rreth 23 skema sociale dhe pensionale. Numri i tyre po rritet çdo ditë, në varësi të rënies së mbështetjes së partive në pushtet. Sa herë që ju duhen vota në prag të zgjedhjeve, krijojnë nga një skemë të re. Prej tyre aktualisht përfitojnë rreth 350 mijë persona, që buxhetit të shtetit i kushtojnë rreth 372 milionë euro në vit”, ka shkruar Krasniqi në rrjetin social Facebook.

Gjersa, ka deklaruar se në mesin e përfituesve të këtyre skemave, në emër të pensionit invalidor, janë edhe shumë politikanë në pushtet, përkundër që deklarojnë të hyra vjetore mbi 100 mijë euro dhe pasuri të paluajtshme rreth një milionë euro.

“Përjetësisht mirënjohës për të gjithë ata/ato që kanë kontribuar për lirinë e vendit. Por që pensionet dhe ndihmat sociale për një vend të varfër si Kosova, duhet të shkojnë vetëm për personat që vërtetë kanë nevojë”, ka shkruar ai.

Ndryshe, Infokusi ditë më parë ka raportuar lidhur me skemat sociale dhe pensionale dhe përfituesit e tyre. /Infokusi.

Të tjera