Lajme

Ministria e Shëndetësisë nuk ka kërkuar ende furnizim me barna esenciale

Autori: Gazeta inFokus 13:45 | 19 March 2018

Kompania “Redoni H M” e kontaktuar nga Ministria e Shëndetësisë për furnizim me barna, është duke e pritur kërkesën e kësaj të fundit për t’i dërguar ato në QKUK.

Fisnik Ymeri nga kompania furnizuese me barna ka thënë për Infokusin se pas nënshkrimit të kontratës me Ministrinë e Shëndetësisë, ata po e presin kërkesën për t’i dërguar barnat në QKUK.

“Më  12.03.18 kemi nënshkruar Kontratën për furnizime me barna nga lista esenciale. Ne do të furnizojmë sipas kontratës kur të pranojmë Kërkesën/Urdhërblerjen nga Ministria e Shëndetësisë për furnizim të QKUK-së me barna ,deri më tani nuk kemi pranuar nga MSH asnjë liste/kërkesë për këtë furnizim”, ka thënë Ymeri.

Furnizimi  me barna nga Lista Esenciale, me kompaninë “Redoni H M”  përfshinë vlerë prej  158.760,00 euro.

Infokus ka raportuar gjatë ditës se përkundër njoftimit të Ministrisë së Shëndetësisë për furnizim një gjë e tillë nuk ka filluar as të hënën.

Pacientët dhe familjarët e tyre vazhdimisht po bëjnë me dije se kanë telashe me sigurimin e barnave esenciale, megjithatë ata duhet të presin akoma deri sa MSH të dërgoj kërkesën tek kompania furnizuese./ Infokusi

Të tjera