Opinione

Mos na zhgënjeni edhe njiherë!

17:41 | 26 February 2018 Autori: Infokusi

Studiuesit e thonë vazhdimisht se, sa ma shumë e njohim Universin aq ma shumë e kuptojmë botën e qenien tonë! Edhe Zotin! Për me u njoft me universin tonë, duhet takue kulturat, që njashtu si yjet, secila ka shëndritjen e vet! E, sa ma shumë lundrojmë nëpër to, aq ma shumë kem me u njoftue me veten tonë! Edhe Zotin!

Liberalizmi i vizave s’duhet pa, thjesht, në nji dimension teknik! Por, mundësi depërtimi në nji hapësinë, përtej botës që na rrethon. Sepse, përtej dhetmijë kilometrave tonë katror – asht nji Univers i tanë! Vota juej, të nderuem deputetë, ndonëse nji hap i vogël për juve, asht nji hap i madh për neve!

Mohimi i kësaj të drejte elementare me u takue e njoftue me kulturat tjera, që secila në mënyrën e formën e vet – zbulon natyrën e Zotit, asht tradhëtia ma e madhe që mundeni me i ba kësaj shoqnie! Shoqnisë ma të re në Europë, që e keni drynue mbrenda ngushtësisë së botës së juej!

Shoqnitë s’zhvillohen nëpër konzervate. Ato, thjesht, mbesin fise t’humbun në kohë. Kjo asht tradhëtia ma e madhe që mundeni me i ba kësaj rinie!

Shumica juej, të nderuem deputetë, s’i keni dëshirue vetes nji rini të humbun. Keni shfrytëzue tana privilegjet me u pajis me mundësinë me udhëtue, takue, njoftue edhe martue me kulturat tjera. Me i’a mohue nji rinie të tanë të njajtën mundësi, asht tradhëtia ma e madhe që keni ba!

Tanë e pamë që rinia kosovare asht e unt me ‘bashkëjetue’ me Rita Orën! Jo ma me kulturën ngujuese të odave! As të dalldisë me allti! Duen me prek botën që ju u’a keni ndalue! Kjo asht tradhëtia ma e madhe që u’a keni ba! Asnjiherë rinia jonë s’asht ndje ma ‘young europeans’ sesa në koncertin e Rita Orës! Sepse, asht imazhi i rinisë që duen! Ky koncert qe protesta ma e madhe e kësaj rinie, nëse ende s’e keni kuptue, të nderuem deputetë! Ju treguen sheshit çka duen!

Asht në mvarësinë e juej, të nderuem deputetë. Mos i tradhëtoni edhe njiherë! Çelne derën të dalin me marrë frymë. Ta shohin botën, për me e njoft Zotin!

Para se me e çue dorën, të nderuem deputetë, le t’ju kumbojë thirrja e mbramjes së 17 shkurtit, nën tingujt e bukur ‘I will never let you down’!

SHKRUAN: Petrit Musolli

Të tjera