Lajme

Rritja e pagave bllokon Kuvendin e Kosovës

19:08 | 13 March 2018 Autori: Infokusi

Nga fillimi i shkurtit nuk po përfundon seanca e Kuvendit të Kosovës me 30 pikat e rendit të ditës në krye të së cilës është shqyrtimi i vendimit të kryeministrit Ramush Haradinaj për rritjen e pagës së tij.

Kjo ka bllokuar votimin e shumë ligjeve, e vendimeve të legjislativit që figurojnë si të papërfunduara në kalendarin e Kuvendit nga seancat plenare të mbajtura më 2-8 dhe 13 mars, e të cilat duket se nuk do të mund të përfundojnë së paku edhe për një kohë.

E gjithë kjo pasi kryeministri i Kosovës, Ramush Hardinaj assesi nuk po pranon të heq dorë nga rritja e pagës prej 100% që i bëri vetës dhe zëvendëskryeministrave, ministrave, e pjesës tjetër të kabinetit qeveritar, shkruan Infokusi.com

Madje në seancën e sotme të Kuvendit të Kosovës, shefi i Grupit Parlamentar të LDK-së, Avdullah Hoti ka thënë se pa përfunduar pika e parë e rendit të ditës nuk do të marrin pjesë në asnjë votim tjetër.

Ai ka shtuar Kuvendi duhet të përbëhet sa më shpejte pasi shumica nuk i ka votat për të ndalë asnjë vendim.

Kjo pikë përfshinë votimin e rekomandimeve të Interpelancës lidhur me vendimin e Qeverisë së Kosovës nr. 04/20 të datës 20.12.2017 për rritjen e pagave të anëtarëve të Kabinetit qeveritar, Vendimin nr. 05/24 i datës 12 janar 2018, për rritjen e pagave për të gjitha kategoritë e të punësuarave që marrin paga nga buxheti i Kosovës, si dhe Vendimi nr. 15/24 i datës 12 janar 2018 për lartësinë e pagesës mujore për familjet në Skemën e Ndihmave Sociale.

Gjatë seancës së sotme pati dy tentativa të votohet për pikën e parë por pavarësisht numrit  të mjaftueshëm të deputetëve të pranishëm në sallë vetëm 44 respektivisht 46 prej tyre shfrytëzuan të drejtën e tyre për votë duke mos formuar kështu kuorumin e mjaftueshme për vazhdimin e seancës./INFOKUSI

Të tjera