Lajme

Thaçi sjell lajme të mira nga Bullgaria

Autori: Gazeta inFokus 17:20 | 17 May 2018

Presidenti Hashim Thaçi, nga takimi i tij me krerët e vendeve evropiane në Sofje, ka dhënë lajme të mira.

Ai ka thënë se ka nënshkruar një dokument i cili ka mbështetur një agjendë digjitale. Sipas Presidentit Thaçi, ky është një lajm i mirë pasi qytetarët e Kosovës do të përfitojnë në uljen e kostos së romingut në rajon dhe me Bashkimin Evropian.

Përfitues të kësaj agjende sipas Presidentit do të jenë qytetarët, si dhe sipas tij hap që tregon qartë për procesin e integrimit, shkruan Infokusi.com

Postimi i plotë i Presidentit:

Jam i lumtur që sot në Sofje, në emër të Republikës së Kosovës nënshkrova një deklaratë të përbashkët me përfaqësuesit e vendeve të tjera të Ballkanit Perëndimor, për të mbështetur një agjendë digjitale për Ballkanin Perëndimor, duke përfshirë Kosovën. Ky është një hap konkret drejt uljes së kostos së romingut në rajon dhe me Bashkimin Evropian.

Jetësimi i kësaj agjende digjitale është një lajm shumë i mirë për të gjithë konsumatorët dhe një përfitim i qartë i procesit të integrimit. Gjithashtu, kjo do të ndihmojë edhe nisjen e një pakoje të konsiderueshme të asistencës teknike për identifikimin e investimeve të mundshme digjitale dhe për të filluar një dialog të rregullt të rregullatorëve të Teknologjive, Informacionit dhe Komunikimit me Komisionin Evropian. Agjenda Digjitale për Ballkanin Perëndimor do të lansohet gjatë Asamblesë Digjitale në Sofje, më 26 qershor. HTH

Të tjera